ثقافة ثنائي "يوما" الموسيقي يعلّق على الخلاف الذي حصل مع بعض الصحافيين اثر عرض مهرجان صفاقس
نشر في 06 أوت 2024 (16:33)
علّق ثنائي "يوما" الموسيقي على الخلاف الذي حصل مع بعض الصحافيين اثر عرض مهرجان صفاقس كالتالي:
"نشكرو الجمهور إلي حضر البارح و إدارة المهرجان إلي خلاونا نعيشو عرض مزيان مع الناس إلي يحبونا و يحبوا غناياتنا في صفاقس،
و نحبو نشكرو الناس إلي تفاعلوا مع محتوى النقطة الإعلامية الغريبة إلي صارت مبعد العرض.
ماناش باش ندخلو في كيفية أداء المهن، أحنا فنانين مناش صحافيين، أما نطلبو بكل لطف من وسائل الإعلام إلي كانوا حاضرين البارح إنهم يقدموا أكثر إحاطة لصحافييهم أو مراسلييهم باش يتعلموا المرة الجاية يحترموا عمل الفنانين التوانسة، و يتعلموا يتعاملوا مع فنانة أو فنان مزال كيف كمل عرض، و يراجعو عملهم باش يسئلو أسئلة لها علاقة بمحتوى العرض الفني، مش يسئلو فينا على أسامينا و على خيط ما خدمش و على شبينا نرتاحو مبعد العرض، أسئلة كيف هاذي اقل ما إنجمو نقولو عليها هي إنها قلة احترام تجاهنا و تجاه الجمهور إلي يتبعنا، ما فيها حتى إضافة و حتى معلومة تنجم تنفع اي شخص.
و راهو الفنان أو الفنانة بشر، ماهوش ملك عام أو خبر صحفي خدمتنا هي أننا نخلقو موسيقى و نغنيوها لجمهورنا، ماهيش أننا ناقفو قدام ميكروات و نجاوبو على أسئلة تحت الضغط
وجود الصحافة في عروض فنية، على حد علمنا، الهدف الأول و الأخير منه هو تغطية محتوى العرض و مدى نجاحه لدى الجمهور، موش "أنا نسئل و إنت تجاوب".
شكرا، و تحية لكل صحافي أو صحافية يحترم الفنانين و الفنانات التوانسة".
